افضل طرق الاستثمار فى الذهب وتجنب التضخم

فيه ناس فاكرة ان الذهب بيطلع وينزل زي مثلا اي سلعة بناء على العرض والطلب ....  لأ   أبسوليوتلي بصوت اللمبي
عايزك تفهم ان فيه حاجة تاني خالص عشان تفهمها تخيل مثلا شوية بياعين اعدين يبيعوا طماطم في السوق وفعلا السعر بيطلع وينزل بناء على كمية الطماطم المتاحة و عدد الناس اللي محتاجة تشتريها .. راح جاي واحد همه الاول والاخر انه يكسب فلوس ولا همه بأة طماطم ولا بتاع ... البيه ده معاه كمية فلوس كبيرة جداااا .. يعمل ايه ؟؟؟
بيجي يشتري كمية كبيرة من الطاطم مرة واحدة وطبعا معاه فلوس كتير تخليه يقدر على كدة ... كمية الطماطم في السوق هتقل وبالتالي سعرها يزيد لان هنا الراجل بفلوسه حرك العرض والطلب لنقطة مش حقيقية بانه سحب كمية من السوق ... هيعد بأة يشرب شاي ويتفرج على السوق لحد ما توصل الطماطم لسعر معين ... هنا هيقرر انه يبيع الطماطم اللي كان مخزنها لكن بسعر اغلى .. ويحط الفرق في جيبه ويمشي .. المشكلة ان السعر اه هينزل شوية لكن صعب ينزل للسعر الاولاني .. ليه ؟  لأن الناس بأة عندها نوع من التقبل للسعر الغالي وهنا بمجرد ما ينزل السعر شوية بسبب ان الراجل رمى كمية في السوق الناس هتبدأ تاخد اكبر من احتياجها عشان منهم اللي شايف انه لازم يخزن كمية تكفيه لمدة قدام واهو يبقى عمل حساب لانها ممكن تغلى تاني ..
ومنهم اللي شاف انها سبوبة حلوة " رغم انه مش بتاع طماطم اساسا "   بس قالك اهو حلو اجيبلي شوية طماطم اسقعهم وابيعهم لما تغلى تاني
اللي حصل هنا ان عمك اللي معاه فلوس بنسميها Liquidity  ده كسب قرشين كمان على فلوسه .. جزء من مكسبه كان من فريق الغلابة اللي رضيوا يشتروا بسعر اعلى من الطبيعي خوفا من انهم في المستقبل ميعرفوش يتشروا على الغالي  .. وجزء من شوية الفهلوية الكروديات اللي عملوا نفسهم تجار ناصحين واشتروا في سعر عالي طمعا في انهم يبيعوا للغلابة بسعر عالي
الوحيد اللي طبع كسبان هو سعادة الباشا اللي اصلا مش فارق معاه طماطم من خيار
 

اقوى وسيط للتداول فى البورصات العالمية والايداع عن طريق شركة فورى

المشكلة ان في كل الاحوال الراجل ده بفلوسه عرف يحرك السعر لفوق يعني عمل تضخم في الطماطم و خلى السعر اللي كان يعتبر سقف للطماطم بأة منطقة شراهة شراء او دعم
فيه بأة بيه تاني اصيع كمان واوسخ من الاولاني .. ده معاه قرشين حلوين برده بس هيريح دماغه اكتر و هيرزع فريق الفهلوية قفا اكثر احتراما من اللي قبله
ده بيجي بفلوسه الكتير يقول للتجار الكبار بتوع الطماطم انت كدة كدة مخزن الطماطم في المخازن لانك مش عارف تبيع الكمية كلها للناس صح
هيقول للتجار انا عندي ليكم فكرة .. انا هستلف كل الطماطم اللي في المخازن بتاعتكم  لمدة شهر .. مش هسحبها من المخازن بتاعتكم لأ .. انا بس هشترى منكم على الورق كدة بحيث اعرف ابيع واشتري .. وبعد شهر هتنازل ليكم عن الطماطم بتاعتكم تاني و اديكم فوقها مبلغ محترم .. طبعا عرض مغري جدااا
طيب ليه عمنا ده هيعمل كدة وايه مكسبه ؟؟  خليك معايا بس متهنجش مني
عمك ده هيروح رايح بالعقود اللي معاه ده نازل على المحلات ويبيع بالعقود  ده مرة واحدة كمية كبيرة من الطماطم بسعر اقل شوية من سعرها الطبيعي ..ويغرق السوق طماطم .وياخد الفلوس يتاعة الطماطم يحطها في البنك " اللي هو اساسا مدفعش فيها لحد دلوقتي ولا شلن هو كاتب عقود اجلة بس "  طيب هيحصل ايه ؟؟ السعر مرة واحدة هيقع ؟   ده اسمه بيع مكشوف او short selling .. الهدف انه يزق سوق الطماطم نحية تاثير الدومينو .. هيعد بأة جنب الباشا الاولاني برده ياخد شاي هو كمان
طيب مش هو كدة المفروض بيخسر لانه اشترى من التجار الكبار على السعر العادي و باع بسعر اقل ؟؟    لأ اصبر بس عليا
عمك ده هيستنى لما سعر الطماطم بسبب اللي عمله ينزل نزلة جامدة ويروح رايح بالفلوس اللي خدها شاري الكمية اللي باعها لكن طبعا بسعر اقل لان السوق اتحرق .. ويرجع العقود للتجار اللي اشترى منهم ويديهم البونص اللي كان متفق معاهم عليه حق الرهن ويفضله مكسب محترم اللي هو فرق السعر اللي باع بيه واللي اشترى بيه
عشان متنحش معايا افرض مثلا انه اشترى على الورق طن سعره الف جنيه من الموردين وقالهم هديكم فوق الالف جنيه 100 جنيه وهيفضل عندكم في المخزن  .. راح بأة قال للتجار الصغيرين معايا طن تاخدوه على 900  ؟  بس تاخدوا الكمية كلها .. طبعا التجار هيعتبروا السعر لوز العنب وهيشتروا الكمية كلها رغم انها اكبر من قدرة محلاتهم .. السوق هيغرق .. السعر هينزل .. الطن هيوصل ل 700 جنيه ... هيروح رايح تاني يلم من السوق طن بس بالسعر الواقع اللي هو 700 .. كدة هو اخد 900 في الاول ... دفع منهم 700 .. وفضل معاه على الورق كدة الطن ... هيروح للمورد يرجعله العقد بتاع الطن ويديه 100 جنيه   .. وطلع هو كدة ب 100 جنيه من الهوا بعد ما وقع السوق
باع ما لا يملكه   short selling
من الاخر بعد الرغي ده كله .. عايزك تفهم ان الدهب ده لعبة كبيرة جدا .. بيدخل فيه متغيرات كتير جدااااا .. عايز تكسب من وراه وميزعلكش
اشتريه من تحت وبيعه وهو فوق .. هتعمل العكس وارد تكسب ..لكن احتمالية انك تتنفخ هتزيد    risk/reward 

عشان الناس اللي بتسأل 

احنا بنشتري دهب لسببين
الاول استثمار طويل الاجل .. يعني انا عندي عيل عايز اشيله مبلغ يسنده لما يكبر .. او بنت صغيرة وهشيلها مبلغ لجوازها او مبلغ مش محتاجه وعايزه يفضل محتفظ بقيمته الشرائية ضد التضخم .. في الحالة ده حضرتك اشتري الدهب باي سعره ..سيبك من السوق رايح فين خلال شهر و سنة ... الذهب على المدى الطويل قادر يحافظ على فلوسك وعمرك ما هتزعل

السبب التاني ... عايز اتاجر في الدهب .. الدهب خلال رحلة صعوده قصاد اي عملة سواء دولار او جنيه بيمشي في خط مايل لفوق بنسميه ترند .. عبارة عن موجات من الارتفاع والهبوط ... اللي عايز يتاجر بأة محتاج ياخد الدهب قريب من منطقة هبوط من دول ويبيع في منطقة ارتفاع .. دورة هيدخلها كل حوالي ٣ او ٦ شهور .. ياخد منها مكسب ويعيد القصة

الشخص اللي بيشتري للسبب الاول يريح دماغه خالص الدهب بكام حاليا .. وياخد القرشين اللي معاه ويروح يجيب سبيكة او ٢ او ١٠ حسب المبلغ اللي معاه .. وسبيكة يعني دهب عيار ٢٤ .. مش جنيه دهب ولا اي حاجة من ده

لكن الشخص التاني لازم يحط شوية قوانين ويلتزم فيها .. لانه لو مطبقهاش هيزعل والدهب هيزعله .. 

لكن كنت حابب اوضح انك لازم تحدد خطتك من شرا الذهب من الاول عشان تاخد منه فايدة وتريح بالك في نفس الوقت من كتر التفكير