الفرق بين اللحام الكهرباء واللحام co2 امتى تستخدم ده وامتى تستخدم ده

* كتير فاكرين ان الاتنين لحام وخلاص*   بس الحقيقة ان كل ماكينة ليها شغلها، ولو استخدمتها في المكان الغلط هتخسر وقت وفلوس وسلك على الفاضي.

أنا كفني لحام اشتغلت بالاتنين سنين، وشفت بعيني امتى ماكينة الكهرباء تنجزك، وامتى الـ CO2 تبقى هي المنقذ. وفي المقال ده هقولك الخلاصة من غير لف ولا دوران، عشان بعد ما تخلص قراية هتبقى عارف بالظبط انت محتاج انهي واحدة لشغلك
*الفرق بين لحام الكهرباء و CO2 وامتى تستخدم كل واحد فيهم*

كتير من الناس بتحتار وهي بتشتري ماكينة لحام، تختار الكهرباء العادية ولا الـ CO2؟ الاتنين بيلحموا حديد، بس كل واحدة ليها شغلها ومكانها.

*أولا: لحام الكهرباء (السلكة)*

ده اللي كلنا اتعلمنا عليه. ماكينة بسيطة وسلكة بتمسكها بايدك.

*مميزاته:* رخيص، بيستحمل البهدلة، ويقدر يلحم حديد تخين ومصدي. لو بتشتغل برة في الشارع او في مكان فيه هوا، هو ده اللي هينجزك. وصياته مش مكلفه 

*عيوبه:* عايز ايد صنايعي بجد، وبيعمل شرز ودخان كتير، وشكله النهائي بيحتاج تجلخه وتنضفه. ومش حلو للصاج الخفيف، بيخرمه بسرعة. بيوجع العين للغير متعود 

*تستخدمه امتى؟* في شغل الحدادة التقيل، البوابات، الجمالونات، ولحام الحديد التخين.

*ثانيا: لحام CO2 *

ده الماكينة اللي بسلك ملفوف وبتطلع غاز وهي بتلحم.

*مميزاته:* لحامه نضيف وشكله حلو من غير ما تجلخ. سريع جدا، يعني هتنجز شغل كتير في وقت قليل. وممتاز جدا للصاج الخفيف بتاع العربيات والشكمانات، مش بيخرمه. ومش محتاج خبرة كبيرة زي الكهرباء.

*عيوبه:* ماكينته اغلى، وعايز اسطوانة غاز جنبه، فمش هتعرف تتحرك بيه بسهولة. ولو في هوا شديد برة، الغاز بيطير واللحام بيبوظ.

*تستخدمه امتى؟* في شغل الصاج، سمكرة العربيات، شغل الورش اللي عايزة فينش نضيف وسرعة.

*الخلاصة:*
لو شغلك تقيل وفيه بهدلة وبرة.. خليك في الكهرباء.
لو شغلك خفيف ونضيف وعايز سرعة وفينش حلو.. خليك في الـ CO2.
والصنايعي الشاطر هو اللي عنده الاتنين ويعرف امتى يستخدم كل واحده 

بنصح كل شخص للشغل بى الCO2 ويتعلمه بإتقان علشان ده المطلوب فى الشركات حاليا وغير مجهد للعين مثل اللحام الكهرباء  أنا مجرب ده ومجرب ده أنا كفنى دارس  الاثنين نظرى وعملى بلاش نخلى كلام كتب يضحك علينا وعن تجربى لى الاثنين خليك فى الCO2 اتعلمه شغله نظيف وغير مجهد مفيش دخان طالع منه يتعب صدرك أو عينك  بلاش نخلى لحام الكهرباء اهم شئ عندك لانه فعلاً ضار جدااا عارف ان فى ناس كتير هتقولى احنا شغالين عليه بقالنا كتير  سنين  قوالب الحمد الله أن ربنا سترها عليك ويارب استرها على كل فنى ومساعد فى مجال اللحام  وربنا يرزق الجميع متخليش اى Hr يقولك مرتبك 7000  وبقا فرحان انك نازل على كده ده مش مرتب ده يدوبك تركب بيه مواصلات 

(كاتب المقال: اخوكم احمد فنى لحام )