ازاي تأسس شركتك بنفسك في هيئة الاستثمار
ازاي تأسس شركتك بنفسك في هيئة الاستثمار
في البدايه لازم نعرف سريعا مع بعض انواع الشركات وكل شركه متطلباتها ايه علشان تقدر تحدد نوع الشركه اللي انت عايز تاسسها ايه بعد كده هنتكلم عن خطوات تاسيس كل شركه من الشركات باختصار
وبكده هنقسم موضوعنا ل3 نقاط :
1/ ايه هي انواع الشركات ؟
2/ متطلبات كل شركه
3/ اجراءات كل شركه
ناخد مع بعض اول نقطه ; ايه هي انواع الشركات داخل هيئات الاستثمار؟
انواع الشركات :
(مساهمه - ذات مسئوليه محدوده - شركة شخص واحد - شركة تضامن - شركة توصيه بسيطه) بالاضافه للمنشآت الفرديه
الشركه المساهمه تتكون من 3 شركاء على الاقل كل فرد منهم بيساهم بجزء من راس المال وبتبقى عباره عن ايه عن رئيس مجلس اداره ونائب رئيس مجلس اداره واعضاء مجلس
ثاني نوع من الشركات عندنا الشركه ذات المسؤوليه المحدوده مسؤوليه الاشخاص تنحصر فقط في حصة كل شريك في رأ سمال الشركه والنوع ده من الشركات بيكون عدد الشركاء فيها ما يقلش عن اثنين وما يزيدش عن 50 شريك
شركه الشخص الواحد ودي انا بعتبرها من افضل انواع الشركات اللي بيتم تاسيسها داخل هيئه الاستثمار وبيكون مؤسس الشركه او مالك الاسهم بتاعتها شخص واحد فقط
اما بالنسبه لشركات الاشخاص بتنقسم الى شركات تضامن وشركات توصيه بسيطه ودي ايضا بتكون اثنين شركاء على الاقل بالنسبه لشركه التضامن بيكون الاثنين الشركاء متضامنين اما بالنسبه لشركه التوصيه البسيطه بيكون احد الشركاء على الاقل شريك موصي
اما بالنسبه للمنشات الفرديه فدي بتكون منشاه خاصه بصاحبها يعني شخصيه المنشاه من شخصيه صاحبها . ومسئول مسئولية كاملة عنها .
متطلبات كل شركه و اجراءات تاسيس كل شركه
الشركه المساهمه اول خطوه بتتم فيها هي شهاده عدم التباس الاسم التجاري ودي بنقدم عليها من على الموقع الخاص بشهاده عدم التباس الاسم التجاري الخاص بهيئه الاستثمار بتدخل ع الرابط دا وتعمل اكونت وتقدم من خلاله علي شهادة عدم الالتباس
بعد ما بتقدم على الموقع ده على الاسم اللي انت محتاجه لشركتك ويتوافق لك عليه بتاخد شهاده عدم الالتباس و بطاقات الرقم القومي للشركاء او المساهمين واعضاء مجلس الاداره وجواب مراقب حسابات شركات مساهمه ده بيكون محاسب قانوني ولكن اخذ مراقبه شركات مساهمه زائد صوره من كارنيه محامي ما يقلش درجته عن استئناف ومختومه بالختم بتاعه وبتدخل هيئه الاستثمار تاسس شركتك والنوع ده من الشركات بتكون اطول اجراءات واكثر تعقيدا
نيجي بعد كده للشركه ذات المسؤوليه المحدوده وشركه الشخص الواحد نفس الخطوه الاولى اللي قلناها في الشركات المساهمه اللي هي شهاده عدم التباس اسم تجاري هنعملها برده في شركه ذات المسؤوليه المحدوده وشركه الشخص الواحد وبعد كده بنجهز طبعا بطاقات الشركاء شركه ذات مسؤوليه محدوده وبطاقه المالك للاسهم في شركه الشخص الواحد وبيكون برده معانا جواب مراقب الحسابات وكارنيه المحامي اللي هيكون مستشار قانوني في الشركه وطبعا سواء مراقب الحسابات او المستشار القانوني في الشركه دي بتكون بند من بنود العقد فقط لكن مش بيكونوا متعينين عندك جوه شركتك ولا بتديهم مرتبات لكن لو حابب تعمل كده وتاخد منهم استشارات لشركتك بصفه دوريه بتتفق معاهم على اتعاب دايما بعد ما بتجهز الاوراق دي بتدخل تاسس شركتك
نيجي بعد كده لشركات الاشخاص والمنشاه الفرديه دول بيتاسسوا الكتروني بالكامل من على الموقع الخاص بهيئه الاستثمار متطلباتهم بتكون ايه اولا بطاقات الشركه بتكون معاك لو انت وكيل بتبقى محتاج توكيلات من الشركاء ولو انت شريك بتكون محتاج يكون معاك توقيع الكتروني(توكن) علشان تقدر توقع انت وشريكك من على الموقع الخاص بهيئه الاستثمار او تعمل توكيل لمحاسب او لمحامي او ايا كان الشخص اللي بيكون معاه توكين وهو بيوقع نيابه عنك وطبعا بتسدد الرسوم على مو قع هيئة الاستثمار
في النهايه كده بنكون عرفنا انواع الشركات اللي ممكن ناسسها في هيئه الاستثمار وايه الاوراق اللي بتبقى مطلوبه معاك علشان تاسس شركتك في هيئه الاستثمار ومتطلبات كل شركه من الشركات دي وفي النهايه بعد ما بتاسس شركتك في هيئه الاستثمار بيكون معاك عقد الشركه موثق من هيئه الاستثمار بالاضافه لقرار التاسيس لشركتك بالاضافه لمستخرج السجل التجاري والبطاقه الضريبيه.
وفي النهايه يا صديقي اتمنى اكون قدرت افيدك باختصار واتمنى تكون استفدت من الموضوع وتقدر تاسس شركتك بنفسك ولو في اي استفسار او جزئيه محتاج تعرف عنها اكثر ممكن تكتب لي استفسارك في التعليقات دمتم في امان الله
